Est 9 | KYG | STEP | Tuolofu kaimo agi'amo A'na kaile'mo tetini afina'mo Kini vekamo'a ani kava'mo hiyo, huno hu male'niya kava'mo hisaya afina'mo ago afole ai'niye. Yu vaya'ai kame vaya'apimogi, aeta apaka segaune, hu'a hu'naya'monanafa Yu vaya'mogimo apakaefe'mo alagi ohapau'niya vaya'mo ago ae'a apaka se'nae.

Esther 9

Yu vaya'mogi kame vaya'apimo naipeleti'mo apai'naya gemae

1 Tuolofu kaimo agi'amo A'na kaile'mo tetini afina'mo Kini vekamo'a ani kava'mo hiyo, huno hu male'niya kava'mo hisaya afina'mo ago afole ai'niye. Yu vaya'ai kame vaya'apimogi, aeta apaka segaune, hu'a hu'naya'monanafa Yu vaya'mogimo apakaefe'mo alagi ohapau'niya vaya'mo ago ae'a apaka se'nae. 2 Yu vaya'mogimo Kini vekamo Sekisi'a muki ne'yagaiya kote'mo hane'niya taonifi'mo mai'naya kame vaya'apimogi anona'apilefe'mo kame hisayafe'mo ali'a anupa hu'a mai'nae. Muki vaya'amogimo Yu vaya'aife'mo koli'apimo hu'naya'mofe'mo mago vaya'mogimo alagi afa'a ae'a apaka ose'nae. 3 Muki kotegamo ne'yagaiya vayanagi muki gamani vayanagi muki kini vekamo ali'ya'amo ne'aliya vayanagi hu'a Motekaife'mo koli hu'naya'mofe'mo Yu vaya'mo hapa mae'nae. 4 Muki vaya'amogimo agayana kini vekamo'a Motekai'mo alopa napamo alino amige lokiya'amo alino amige hu'nige'a age'nae. Inagi muki afina'mo Motekai'a lokiya'amo'mo mago'e huno afole ai'niye. 5 Inagi muki Yu vaya'mogimo apayapi'mo lusi kava hu'a naipe'apimo ali'ne'a asole kame vaya'api'e'mo kame hute'a naipeleti'mo apai'nage'a fali'nae. Apakaemo alagi apakaefe'mo ohapau'niya vaya'aitegamo hapau'niya agufa kava'mo afa'a hu'nae. 6 Susa taonifi'mo gamani yafa lafi kegi'yafi'mo Yu vaya'mogimo faefu hataleti'a vaya'mo naipeleti'mo apai'nage'a fali'nae. 7 Yu vaya'mogimo Hemani mafa'ne anaga'amo naya lole'a mafa'ne anaga'mo naipeleti'mo apai'nae. Ani Yu vaya'ai kame'apimo Hemani afo'amo'mo Hema'nata'ae. Hemani mafa'ne anaga'amogi apaki'apimo Pasanata'agi Talifoni'agi Asapata'agi Polata'agi A'naliya'agi Ali'nata'agi Pamasita'agi Alisai'agi Alitai'agi Vaisata'agi hu'a naipeleti'mo ago apai'naya'monanafa Yu vaya'mogimo kagemi ya'apige'mo o'ali'nae.

11 Susa taonifi'mo gamani yafa lafi kegi'yafi'mo mai'naya vaya'mo Yu vaya'mogimo na magi vaya'mo naipeleti'mo apai'nafi hu'a kini vekae'mo ha pai'nae. 12 Kini vekamo'a Kuvini a kanomo Esatafe'mo ina ge huno ha pai'niye. Yu vaya'mogimo Susa taonifi'mo gamani yafa lafi kegi'yafatike'mo faefu hataleti'a kame vaya'apimo naipeleti'mo apai'nage'a fali'nae. Ani kava hu'a Hemani mafa'ne anaga'amo naya lole'a mafa'ne anaga'mo naipeleti'mo ago apaite hu'nae. Muki alu kotegati'e'mo na agufa kava'mo hu'nae. Na agufa kavafe'mo ge huka nafi gesapi ani kava'mo afa'a huguve. Mago'e kavafe'mo kahau'nisigekae'mo ge huka nafi gesana'mo'mo afa'a he, hu'nage'mo huguve. 13 Esata'a, kini vekae, huno, kagaemo kahau'nisiya'mo'mo egamo Yu vaya'mo afa'a apate'nege'apao Susa taonifi'mo magoke agufa kavake'mo hiyo. Inagi Hemani mafa'ne anaga'amo naya lole'a mafa'ne anaga'ai apakufa'amo posi yosale'mo apane'mu ae'a asaiyo. 14 Inagi kini vekamo'a, ani kava'mo hiyo, huno hapa pai'niye. Agaemo Susa taonifi'mo ani ke'aepa gemo avo'mo kae male'nige'a Hemani mafa'ne anaga'mo naya lole'a vaya'ai apakufa'amo posi yosale'mo apane'mu ae'a asai'nae.

15 Inagi kaimo agi'amo A'na kaile'mo fotini afina'mo Susa taonifi'mo mai'naya Yu vaya'mogimo halate ali'a anupa hute'a mago'e hu'a tali hataleti'a vaya'mo naipeleti'mo apai'naya'monanafa kagemi ya'apimo o'ali'nae.

16 Kini vekamo'a muki ne'yagaiya kotegamo mai'naya Yu vaya'mo ofali'a afa'a maisayafe'mo ali'a anupa hute'a seveti faefu tauseni'a kame vaya'apimo naipeleti'mo apaite'a mai'a falu hu'nae. Naipeleti'mo apai'naya'monanafa kame vaya'apimogi kagemi ya'apimo o'ali'nae. 17 Ani kamemo muki taoni'afi'mo A'na kaile'mo tetini afina'mo hu'nae. Fotini afina'mo mai'a falu hute'a alopa yagita hu'a ne'ne'a lusi kava hu'a apamogaga ai'naya'monanafa 18 Susa taonifi'mo mai'naya Yu vaya'mogimo fifitini afina'mo mai'a falu hu'nae. Apakaemo tetini afina'e fotini afina'e'mo kamemo hute'a fifitini afina'mo mai'a falu hute'a alopa yagita hu'a ne'ne'a lusi kava hu'a apamogaga ai'nae. 19 Ani kavatefe'mo aise taonifi'mo yafa lafi kegi'yamo ohane'niya taonifi'mo mai'naya Yu vaya'mogimo A'na kaile'mo fotini afina'mo hopa afina'mo lekana pai malete'a alopa yagita hute'a lusi kava hu'a ne'ne'a apamogaga ai'a apakai'apimo magoke magoke vaya'mo hapa mae'a apamogaga ya'mo ali'a apami'nae.

Mago alopa ne'yafe'mo Yu gefati'mo agi ae'apae'mo Pulimi ne'yane, hu'a agi ae'naya gemae

20 Motekai'a ani afina'mo afole ai'niya kavafe'mo ava gemo huno avo'mo kaeno atalegeno haopale'mo mai'naya Yu vaya'aitegamo uge afagi kotegamo mai'naya Yu vaya'aitegamo uge kini vekamo Sekisi'a yagaino ne'apateya kotegamo atalegeno uge huno uneno hu'niye. 21 Agaemo hapa paino'ae'mo, Muki kafuga'ae'mo A'na kaimo fotini afina'e fifitini afina'e'mo hopa kava'mo hiyo. 22 Ani lole afina'mo Yu vaya'mogimo kame vaya'api'e'mo kame hute'a hu'a ae'a apakasete'a mai'a falu hu'nae. Ani kaile'mo apaipamo'mo kana hu'niya kava'apimo anonalefe'mo apamogaga ai'nae. Yulagefa ai'naya kava'apimo anona'ale'mo hopa kava'mo hu'nae. Motekai'a, Ani lole afinafe'mo alopa yagita huge lapamogaga aige lapao vaya'e kagemi ya'apimo o'male'nisaya vaya'e'mo fiku hapa maetapa apamige hiyo, huno hapa pai'niye. 23 Motekai'a ani gemo avo'mo kae male'nige'apae'mo Yu vaya'mogimo akame hu'a muki kafuga'ae kafuga'ae'mo hopa kava'mo hu'a mai'nae. 24 Hemani'a Hame'nata mafa'ne'amo Agagai nofi vekamo'a Yu vaya'ai kame'apimo mai'neno'ae'mo muki Yu vaya'mo apaino hano huno apatalesiyafe'mo agesa afi'niye. Agaemo apaisige'a falisaya afinafe'mo kahauya huno agesiyafe'mo satugana agufa yokalomo leno kahauya hu'niye. Ani yokaloe'mo Yu gefati'mo agi'amo Pulie. 25 Kahauya hu'niya'monanafa Esata'a kini vekalegamo u'nigeno'ae'mo kini vekamo'a Hemani'mo hosu kava'mo hisiyafe'mo agesamo afi'niya kava'amo'mo agai'a agenopale'mo asagauno aisige'a agai'a'e muki mafa'ne anaga'a'e'mo posi yosale'mo apane'mu ae'a asaisayafe'mo ke'aepa gemo avo'mo kae'niye.

26 Hemani'a Puli yokalomo le'niya'mofe'mo ani hopa afinafe'mo agi'amo Pulimie hu'a agi ate'nae. Ani avo'mo ava gemogi age'naya kavafenagi apakaetegamo afole ai'niya kavafe'mogi hu'a 27 Yu vaya'mogimo ke'aepa gemo hu malete'apae'mo, Lagaemogi muki laginago vaya'mogi alu nofi vaya'mo e'a Yu nofi vayapi'mo maisaya vaya'mogi'e'mogi hu'a muki kafuga'ae'mo hiyo, huta hu'nona gemo akame hute'a ani lole afinatefe'mo apamogaga ai'a hopa kava'mo hiyo, hu'a hu'nae. 28 Inagi muki magoke magoke Yu afamo anaga'mogimogi henaga'amo muki afole aisaya vaya'mogimogi muki polovenisifi'mo mai'naya vaya'mogimogi muki alopa taonifi'mo mai'naya vaya'mogimogi hu'a muki kafuga'ae'mo ani alopa afina'mo Pulimi afinafe'mo apakesa afite'a mai'a falu hugae. Fiku yanage'a henaga'amo apake kanigiye, hu'a hu'nae.

29 Apiheli a'mafa'nemo Kuvini a kanomo Esata'e Yu vekamo Motekai'e'mo mago'e alu avo'mo kaete'ana ani lole Pulimi afinafe'mo hane'niya gele'mo ali'ana male'na'ae. Himamu'anileti'mo hopa hisaya kava'mo ali'ana lokiya vai'ana ate'na'ae. 30 Motekai'a muki vani hataleti tuveti seveni'a polovenisifi'mo mai'nageno kini vekamo'a yagaino ne'apateya Yu vaya'aitegamo ani avo'mo kaeno atale'nigeno u'niye. Ani avopi'mo apaipamo'mo falu hisiya agufa lama gemo avo'mo kaeno atale'nigeno u'niye. 31 Ani avopi'mo Pulimi hopa afinafe'mo Yu vekamo Motekai'e Kuvini a kanomo Esata'e'mo apakae'e apakinago vaya'mogi'e'mo akame hisayafe'mo avo'mo kae male'na'a gemo hane'niye. Ani gemo ne'ya'mo mo sige yulagefa aige hu'a maisaya kavafe'mo hu'na'ae. 32 Esata'a Pulimi afina'mo hiyo, huno hapa pai'niya gemo'mo ani kava'mo alino lokiya vaino ate'nigeno gamani vaya'ai mukufi'mo avo'mo kae'niye.